Најава за нашата држава како следна дестинација за одмор е дел од промоцијата на Агенцијата за промоција и поддршка на туризмот како дел од годишната програма за промоција на туристичките потенцијали на земјава и привлекување на странски туристи. На креативен начин, АППТ допира до потенцијалите туристи кои патуваат долж автопатот – Е75, пласирајќи фотографии од храна и вино, туристички атракции и познати локации каде можат да поминат дел од своето слободно време.
Насочувањето и задржувањето на туристите кои минуваат низ Република Северна Македонија се одвива преку билборд кампања во Србија која е во траење од 4 недели и опфаќа бројни билборди поставени по должина на автопатот Е75. Почнувајќи од Белград, па се до македонската граница, овој пристап со т.н. надворешно рекламирање значи директно зајакнување на промоцијата на локациите кои се атрактивни за туристите, а се наоѓаат во непосредна близина на автопатот.
Во фокусот на промоцијата е гастрономијата и искуството кое туристите би го добиле доколку одберат да одморат попатно во земјава. На билбордите може да се видат актрактивни фотографии од традиционална македонска храната и вино, преку блесокот на Охридското и Дојранското езеро, археолошките приказни на Стоби, па се до динамиката на Скопје.
Очекувањата од овој тип на рекламирање е да се надмине минатогодишниот број на туристи во Демир Капија, Дојран и други места долж патниот правец Е-75 преку праќање пораки дека доколку застанат ќе искусат само трошка од она што нашата земја може да го понуди.
