Авторитетот во туристичката индустрија, најсилниот бренд во туризмот со масивна публика низ целиот свет – Lonely Planet, го воздигна Охрид со прогласување за еден од 10-те најдобри градови за патување во светот за 2017-та година. Охрид е дел од публикацијата Best in Travel 2017, принтана едиција, која претставува основа за љубителите на патувањето повеќе од 40 години.
Респектираниот водич, кој е најсилен бренд во оваа индустрија, се издава еднаш годишно, потенцирајќи ги дестинациите кои ќе бидат “најжешки” во годината што следи. За сето ова да добие на кредибилност, секоја година интернационален тим на Lonely Planet составен од експерти за патување, автори, уредници и селектирана група од туристичката заедница препорачуваат; топ 10 земји, топ 10 градови и топ 10 региони за годината.
Како што пишува во водичот: “…Во Охрид ќе ги видите старите жени облечени во црно како носат производи кон дома набавени од пазарот и разговараат со пријатели на древните улици, додека во позадина ѕвонат црковните ѕвона. Познатите цркви кои го одбележуваат стариот град и областите околку него феноменално сведочат за преживеаните: Света Софија е градба која датира од 11-ти век и во неа има фрески од Византиско време кои сеуште може да се видат во апсидата, додека Црквата Свети Јован на Канео е една од најфотографираните места на Балканот, со својата прекрасна силуета врамена во водата на Охридското езеро во позадина”.
Охрид е на петто место на листата на топ градови за 2017-та. Топ 10 градови според Lonely Planet- Best in Travel 2017 се :
1. Бордо, Франција
2. Кејп Таун, Јужна Африка
3. Лос Анџелес, Калифорнија
4. Мерида, Мексико
5. Охрид, Македонија
6. Пистоиа, Италија
7. Сеул, Јужна Кореја
8. Лисабон, Португалија
9. Москва, Русија
10. Портланд, Oregon
Покрај тоа што Охрид ќе го дознаат страствените љубители на туризмот кои се публика на овој бренд, ексклузивата доаѓа со тоа што оваа едиција е проследена со огромна медиумска кампања низ целиот свет.
“Бројките се импозантни! Минатата година медиумската покриеност досегнала до 2 милијарди луѓе со дополнително рекламирање на улични банери во Англија, билборди и брендирани возила во Австралија, па се до авионски конекции до Тасманија. Практично целиот свет. Дополнително, 1,4 милиони информативни писма кои Lonely Planet ги испраќа до нивните регистрирани посетители, 3,5 милиони следбеници на Твитер, 1,46 милиони фанови на Фејсбук, 1,6 милиони следбеници на Гугл +, 703 илјади обожаватели на Инстаграм и 700 илјади верни обожаватели на Пинтрест. Ова сумирано значи 4,8 милиони посети на интернет страната на Lonely Planet за само 2 дена од објавувањето на избраните дестинации или 37 илјади часа поминати читајќи за истите. За оваа година, оваа масивна рекламна кампања што ќе ја добие Охрид, ќе биде збогатена со реклама на нови социјални алатки како InstaWalks, G+Hangouts on Air и Tweeter chats, а со тоа се предвидува да оствари медиумска кампања што според проценка на Lonely Planet би ја чинела Македонија повеќе од 6 милиони фунти.“ – изјави Лела Крстевска, Директор на Агенцијата за промоција и поддршка на туризмот на Република Македонија.
Принтаната едиција на Lonely Planet – Best in Travel 2017 ќе биде достапна во електронска форма на 6-те интернационални интернет страни на Lonely Planet и преведена на сите јазици, вклучително и нејзина дистрибуција низ целиот свет.
Со прогласувањето на Охрид од страна на Lonely Planet за еден од најдобрите 10 градови во 2017-та година, Македонија доби неограничени можности за развој на брендот и креирање на лојалност на туристите преку децениското искуство на искусните патувачи на Lonely Planet, овојпат инспирирани од незаборавното искуство во Охрид, Македонија.
При одлуката што да се вклучи во Lonely Planet – Best in Travel годишната секција, инволвирана е целата Lonely Planet заедница: од нивните автори и уредници, па се до нивното интернет семејство на блогери и твитерџии. Секоја година, тие предложуваат стотици места кои не треба да се пропуштат. Овие места подоцна внимателно се селектираат од експертите за патување следејќи ги критериумите како актуелно, возбудливо и wow- фактор.
