Туристичкиот сектор на Република Северна Македонија и Србија денес се на најголема туристичка бизнис средба, со цел зголемување и продлабочување на соработката во духот на Отворен Балкан.
Агенцијата за промоција и поддршка на туризмот (АППТ) во соработка со Туристичката Организација на Србија се иницијатори и организатори на бизнис настан помеѓу туристичкиот сектор на двете земји, на кој се присутни повеќе од 140 тур оператори и хотелиери. Настанот започна со презентација на туристичкиот сектор од Србија и можностите кои ги нуди нашиот сосед за остварување на туристичка размена помеѓу Србија и Северна Македонија.
Директорот на АППТ, д-р Љупчо Јаневски, директорката на Туристичката Организација на Србија, Марија Лабовиќ и г-ѓа Невена Јовановиќ, Амбасадор на Република Србија во Северна Македонија во обраќањето ставија акцент на можностите за зајакнување на партнерски односи и создавање на нови. Соработката меѓу Северна Македонија и Србија е на високо ниво, за што се надеваат дека оваа тенденција на пораст на туристичка размена ќе остане и во иднина.
“Со оглед на тоа дека бројот на туристи меѓу двете земји од година во година расте, Агенцијата за поддршка и промоција на туризмот ќе продолжи и понатаму да ја дава потребната поддршка и размена на искуства со туристичкиот сектор од Србија. Во периодот што следи Агенцијата за поддршка и промоција на туризмот ќе организира и информативни патувања за новинари и инфлуенсери, во соработка со туристичката организација на Србија. За престојнава сезона очекуваме раст од 10% до 20% на српски туристи”- изјави директорот на АППТ, д-р Јаневски.
Успешните промотивни активности на македонската Агенција за туризам на туристичкиот пазар во Србија, позитивно се одразија на зголемување на број на туристи и од оваа земја кои во последниве неколку години изнесува повеќе од 45%. Согласно статистиките 12% од вкупниот број на туристи, припаѓаат на српските посетители, со реализирани 20% од вкупниот број на ноќевања. Се радуваме на новата авио линија Охрид-Белград која ќе овозможи дополнителна туристичка размена и патување до дестинациите.
Следејќи ги светските трендови Агенцијата за промоција и поддршка на туризмот преку апликација на ЕУ фондови за земјите од Западен Балкан потпишаа договор за соработка со Туристичка Организација на Ниш, со кој преку меѓуграничните проектите кои се во фаза на реализација и нови предвидени проекти ќе дејствуваме во создавање услови за унапредување на туристичкиот производ и значително збогатување на понудата и туристичките содржини на двете земји.
Туристичкиот сектор од Србија ќе има можност да ги посети малите семејни винарии во руралните предели на Северна Македонија. Реализиацијата и организацијата на еднодневното информативно патување е во соработка со ИМЕ- Швајцарска програма за зголемување на пазарната вработливост.
