На денешната презентација на стратешкото планирање за следната 2024 година од Агенцијата за промоција и поддршка на туризмот – АППТ и презентираните резултати за првата половина од 2023 година, директорот д-р Љупчо Јаневски пред присутните стави акцент на потребата од континуирана работа и точки на подобрување во македонскиот туристички сектор.
Резултатите во првата половина од годината во целост го потврдија стратешкото планирање за 2023 година кои се базирани на надминување на резултатите од 2019 година, предвидувајки го спорото закрепнување на неколку традиционални пазари и концентрирајќи се на примарни пазари кои постигнаа за 20-50% подобри резултати споредбено 2019/2023 година. Зголемување на портфолиото од дестинации од кои имаме гости во нашите туристички места и традиционалните пазари создадоа исполнетост на сместувачките капацитети за повеќе од 90% во месеците јули и август, додека резервациите продолжуваат до крајот на октомври потврдувајки ги целите од 3,3 милиони ноќевања и повеќе од 530 милиони долари туристички промет оваа година во македонската економија од туризмот.
„ Предвидениот пад на домашните туристи се ублажи и е помал од 2%, а скокот на странските туристи за оваа година во првата половина се движи помеѓу 30-40% , додека резултатите од најдобрата 2019 година во Скопје и Охрид се веќе надминати. Ова е силна порака до сите нас дека „Целта е достижна и треба да продолжиме со континуирана работа сите заедно за надминување на 3,7 милиони ноќевања во 2025 година , 600 милиони долари и 40.000 вработувања во македонскиот туристички сектор“ истакна на презентацијата Јаневски.
Доколку го компарираме учеството на туризмот во бруто домашниот производ – БДП низ последнате години од 2011 кога изнесувал 0,4 %, во 2018 2,4%, за во 2022 година изнесува 3,6%, постигнувајки 481 милион долари, сврстувајки го македонскиот туристички сектор во првите 10 со раст според Светската Туристичка Организација ( UNWTO). Доколку ги споредиме првите квартали (Q1) на приливот од туризмот од 2018 до 2022 година и покрај пандемијата која започна во 2020 година нема забележено пад, што не може да се случи ако изостанува планирање, континуирана поддршка, промоција, мерливост и континуирана соработка на сите чинители кои на некаков начин го интегрираат туризмот во нивната понуда.
Македонските туристички потенцијали ќе се промовираат на примарните и секундарни пазари за 2024 година, односно Србија, Бугарија, Албанија, Косово, Словенија, Хрватска, Турција, Полска, Романија, Словачка, Велика Британија и Италија. Овие пазари во последните пет години се помеѓу првите 10 земји по број на туристи и остварени ноќевања. Медиумската кампања ќе биде интегрирана со интернационалните саемски преставувања заедно со туристичкиот сектор на светските саеми за туризам во Мадрид, Истанбул, Белград, Берлин, Загреб, Тирана, Букурешт, Милано, Римини, Сингапур, Њујорк, Лондон, Варшава, Измир и овозможување на поголем број B2B средби, презентации и видливост на Република Северна Македонија на светската туристичка мапа, довршување на националното туристичко брендирање, националната туристичка кампања во светски рамки како и продолжување на досегашните одлични практики во дигиталното промовирање од страна на Агенцијата за промоција и поддршка на туризмот. Отпочнување на туристичко брендирање на градовите во соработка со локалната самоуправа односно Скопје – градот на солидарноста е предвиден за програмата во 2024 кој ќе ги покаже ефектите и правецот за понатамошното делување на ова поле. Силен фокус на инфлуенсерите, блогерите и медиумите преку реализација на информативни патувања откривајки ја последната неоткриена туристичка дестинација за голем број на слободни патувачи.
Поддршката на секторот ќе се концентрира на проекти кои овозможуваат трајно зајакнување и развивање на концепти кои веќе успешно функционираат во светски рамки ,односно развој на активниот туризам преку проектот „10 планински врвови“ овозможувајки нови планински патеки, водич за движење во планина како и апликативно решение за сите планински патеки во земјата која има повеќе од 80% планини во својот рељеф.
Развој на руралниот туризам преку повеќегодишниот проект „50 рурални села – 50 туристички приказни“ кој во следните години ќе овозможи повеќе од 500 категоризирани соби во селските средини, развој на агро туризмот, зголемен број на зелени работни места и позитивен развој на локалната економија.
Означување на винските патишта , дегустациски центри, патно означување со знаци, апликативни решенија кои ќе доведат до силен развој на ено-гастро туристичкиот концепт кој забрзано се развива во последните две години.
Подобрен модел на субвенционирање кој ќе овозможи развојна компонента во дестинацијата и за прв пат модел за субвенционирање на домашните туристи за домашните гости кој според проценките во 2024 година може да донесе 500.000 ноќевања повеќе од домашните туристи во ниската сезона во туристичкиот сектор.
Зајакнување на АППТ со регионални канцаларии – ДМО кои ќе го интегрираат туристичкиот сектор во дестинациите во креирање на туристичките стратегии и политики на локално ниво.
Брендирање на граничните премини и наплатните рампи низ државата како прв чекор во градење и зајакнување на националниот туристички бренд.
Стратешкото планирање на АППТ за 2024 година е во корелација со стратешките согледувања на Светската туристичка организација (UNWTO) во поглед на превземање на активности и можности за развој на туризмот во нашата држава. Затоа во повеќе наврати, а сега потврдено и од Светската туристичка организација-UNWTO, нашите чекори во туризмот треба да се насочат кон создавање на дестинациски менаџмет организации- ДМО преку кои ќе се овозможи реалните проблеми да се детектираат и пренесат вистинските потреби. Неопходно е прераснување на АППТ во Национална туристичка организација со посебни ингеренции или Министерство за туризам, Е-Туризам платформата, валоризацијата на дестинацијата низ различни форми на туристичка понуда, нов закон за туристичка дејност и континуирано зајакнување на човечките ресурси. Периодов ни покажа дека еколошкиот и руралниот туризам се една од клучните работи за одржливост на сите туристички дестинации и туристички сектори.
„Ова се чекорите кои Агенцијата за промоција и поддршка на туризмот се креирани заедно со советот на Агенцијата во кој членуваат сите релевантни туристички чинители јасно покажувајки го фокусот за следните години во македонскиот туризам. Затоа ве повикувам да продолжиме во градење на туризмот кој според моето убедување докажа и ќе докаже со резултатите во блиска иднина дека преставува значајна економска гранка која ќе донесе раст на македонската економија. Имаме можност, каков туристички сектор ќе изградиме во таков ќе работиме и оставиме на генерациите после нас“ истакна на крајот од своето излагање Јаневски.
Презентацијата од Стратешкото планирање на АППТ за 2024 година можете да ја погледнете на следниот линк.
