Агенцијата за промоција и поддршка на туризмот учествува на 40тото јубилејно издание на WTM во Лондон, Англија, каде ги промовира туристичките потенцијали на државата пред потенцијалните туристи од овој пазар, чиј интерес е во насок на авантуристички туризам, сити брејк, природа и култура.
На овогодинешниот интернационален саем за туризам во Лондон има 8 ко-егзибитори на штандот на РС Македонија, што е рекорден број во поглед на излагачи на овој пазар. Бадем тоур, Фибула, Визит Мацедониа, Балкан Експериенс, Камелиа, Бохемиа, хотел Парк и асоцијацијата за дојдовен туризам НАИТАМ остварија бројни состаноци со што најавија успешна туристичка сезона за 2020 година, додека делегацијата на АППТ предводена од директорот Љупчо Јаневски оствари средби со бројни тур-оператори од Израел од кои се отвора можност за нова авио линија Скопје-Тел Авив. Дополнително, за време на саемот дискутирани се детали околу организирањето на чартер лет од Софија до Охрид за месец септември и октомври 2020 година што директно ќе се одрази на бројот на гости од Бугарија.
Штандот на РС Македонија го посетија Euronews, BBC, CNN, Sky News, LBC, како и бројни медиуми, блогери и влогери кои се заинтересирани да ја посетат државата поради фактот дека нивната публика е во потрага по нешто ново, поразлично и пред се достапно.
Директорот на АППТ, Љупчо Јаневски смета дека учеството на саеми од овој тип е една од најсилните алатки за промоција на дестинацијата која нуди директни, мерливи резултати, кои се видливи веднаш и АППТ ќе продолжи и во иднина да ја промовира државата на интернационални саеми за туризам. “Штандот на РС Македонија оваа година има рекордна посетеност од странски и домашни тур-оператори кои пројавија неверојатен интерес за посета на нашата земја. АППТ ќе продолжи посветено да работи на промоција на државава преку вакви и слични алатки кои ќе донесат директен бенефит на индустријата” – вели Јаневски.
Штандот на АППТ беше посетен од Н.Е. Александра Миовска, Амбасадор на РС Македонија во Лондон, како и 10тина домашни тур-оператори кои решиле да не ја пропуштат шансата за вмрежување што ја нуди World Travel Market оваа година.
