Директорката на Агенцијата за промоција и поддршка на туризмот, Билјана Стефаноска, оствари работна средба со претседателката на Македонија, Гордана Силјановска-Давкова, на која главна тема на разговор беше туристичката дипломатија и државната поддршка за унапредување на имиџот на Македонија како атрактивна туристичка дестинација.
Во фокусот на средбата беа можностите за интегрирање на туризмот во надворешната политика, преку активна вклученост на македонските дипломатско-конзуларни претставништва, културни институции и дијаспората, како мостови кон нови пазари и туристички потенцијали.
Директорката Стефаноска го истакна значењето на културната дипломатија, како и потребата за поддршка при организација на настани во странство со фокус на промоција на македонските природни убавини, традиции, и туристички производи.
Дополнително, на средбата се разговараше и за:
∙ поттикнување на туризам од дијаспората преку кампањи и соработки со заедниците во странство;
∙ креирање на државна туристичка стратегија за дипломатска промоција;
∙ вклучување на туристичкиот сектор во државни манифестации, културни денови и посети на високи делегации.
Двете соговорнички изразија взаемна заложба за унапредување на туристичката дипломатија како инструмент за меѓународна поврзаност, економски развој и промоција на македонската автентичност на глобално ниво.
