Директорката на Агенцијата за промоција и поддршка на туризмот, м-р Јасмина Лескаровска и директорот на Државниот архив, д-р Емил Крстески денес потпишаа Договор за меѓуинституционална соработка во Државниот архив. Соработката предвидува изнаоѓање нови можности за промоција на културно-историското наследство преку издавање публикации и промотивни материјали кои ќе содржат архивска документација што ја поседува Државниот архив. Архивската документација во туристички цели ќе ја афирмира националната, локалната и културната историја во нашата држава и ќе го претставува богатото историско минато.
Животот и дејноста на познатите браќа Манаки, постоењето на Крушевската Република, мисијата на Мајка Тереза се дел од содржините кои ќе се презентираат на странските туристи со цел нивно привлекување за посета на знаменитости. Ова е уште една инвентивна форма за промоција на туристичкиот потенцијал на нашата држава.
