Насловна Соопштенија Мегаинтервју на д-р Љупчо Јаневски за магазинот за “Туризам и Mенаџмент”

Мегаинтервју на д-р Љупчо Јаневски за магазинот за “Туризам и Mенаџмент”

Сподели

Соработката на Агенцијата за промоција и поддршка на туризмот на РС Македонија и Универзитетот за туризам и менаџмент се продлабочи со потпишување на Меморандум на соработка. Директорот на Агенцијата за промоција и поддршка на туризмот, д-р Љупчо Јаневски даде мегаинтервју за вториот број на магазинот за “Туризам и Mенаџмент” во издание на Универзитетот. Во интервјуто се направи остврт на повеќе теми значајни за развојот на туристичката гранка.

“Ние не можеме да развиваме туристичка дестинација ако немаме одредени вложувања во туризмот, ние не можеме да вложуваме ако немаме стратегија по која треба да работиме, ако немаме патека по која ќе се движиме”, смета Љупчо Јаневски.

Јаневски потенцираше дека во 2021 година Агенцијата за туризам презентираше плaн и стратегија за достигнување на бројката од 2,2 милиони ноќевања и на домашни и на странски туристи. Предвидовме дека очекуваме 30% зголемување во туристичкиот сектор, тоа и се оствари. Трендот е насочен кон помали сместувачки капацитети, помали групи туристи, патувања во кругот на семејството, при што се повеќе се бараат активни форми на туризам. Всушност, пандемијата покажа кои ни се слабите точки, каква е перцепцијата на туристите за Македонија како дестинција и што е она на што треба да работиме за да се подобриме. Македонија располага со огромни потенцијали за привлекување на туристи, силните страни ни се руралниот, екотуризмот и активните форми на туризам.

Охрид ни е туристичкиот бисер, и да, се сложувам дека Охрид како туристичка дестинација треба да го има приматот, но тој треба да се освежува со дополнителни форми на туризам и сето она што треба како дополнителна атракција да им го понуди на туристите. Ме охрабрува дека во 2022 година заеднички со програмите на УСАИД, ИМЕ И СИПО ќе почнеме да работиме дополнителни видеа и дополнителни кампањи што ќе овозможат уште поголемо зајакнување на алтернативните форми на туризам и на зголемување на туристичката понуда во одредени дестинации.

“Заедно со туристичкиот сектор треба да создадеме услови да ги задржиме овие 1.7 милиони ноќевања на домашни туристи, но дополнети со странски туристи. За 2022 година, една од целите на Агенцијата е да стигнеме до 2,5 милиони ноќевања, на таков начин што ќе ги задржиме домашните и што ќе стимулираме што поголем број странски туристи да ја посетат нашата дестинација“, -изјави д-р Љупчо Јаневски за магазинот за “Туризам и Менаџмент”.