logo

Агенција за промоција и поддршка на туризмот

 


Македонија заедно со уште 50 земји претставена на 40-тото издание на саем за туризам во Белград

Македонија заедно со уште 50 земји претставена на 40-тото издание на Интернационалниот саем за туризам во Белград, кој се одржува од 22-ри до 25-ти февруари 2018 година. 


 

 

Белградскиот саем за туризам е најголемиот туристички настан во земјата и Југоисточна Европа. Традиционално,  40 години ги исполнува светските стандарди во туристичкиот бизнис, гради партнерски односи со изложувачите кои преку квалитетни понуди и разни настани го привлекуваат вниманието на туристичките ентитети. Меѓународниот карактер на овој настан го потврдија 1.200 излагачи од кои се очекува да ги претстават уникатните туристички производи и новите трендови во туризмот на околу 70.000 посетители и потенцијални патувачи.

 

 

Агенцијата за промоција и поддршка на туризмот на Репубика Македонија (АППТ) заедно со претставници од приватниот сектор меѓу кои: ТА Бадем Тур, ТА Глобус Травел, ТА Бохемија, НАИТМ- Национална асоцијација за дојдовен туризам, хотел Гранит и хотел Климетица од Охрид, хотел Гогов од Пехчево, ресторан Острово од Охрид, хотел Парк од Скопје, претставници од ХОТАМ и општина Охрид, ги претставија своите туристички производи. Истите дискутираа за подобрување на саемското претставување и зголемување на туристичкиот промет и бројот на туристи од српскиот туристички пазар, остварија и состаноци со бизнис партнери и туристички професионалци од регионот и пошироко.

 

 

“Репрезентативниот штанд на Македонија кој ги отсликува природните убавини на нашата земја е место каде сите посетители и учесници може да се запознаат со културата, традицијата и туристичките вредности кои не прават различни и уникатни од останатите дестинации. Несомнено и за поздравување е фактот дека македонскиот штанд професионално организиран,  е место каде во позитивна и пријатна атмосфера туристичкиот еснаф од Македонија разменува идеи и искуства со заедничка цел. Во контекст на ова, сите залагања се во насока на успешна туристичка сезона преку интегрирање на туристичката индустрија и отстранување на слабостите, со заедничка работа и координација. АППТ упатува благодарност  до пеачката група “Тоше Проески” и Здружението на Македонци „Вардар“ од Србија, кое со театарскиот перформанс на македонскиот штанд “Моја Македoнија“ ја заскокоткаа љубопитноста на сите учесници и посетители на саемот”- изјави директорот на АППТ, г-дин Љупчо Јаневски.

 

 

АППТ зема активно учество и на настанот по повод промоција на заедничкиот туристички производ на Македонија и Србија, во организација на Здружение на угостителство и туризам при Стопанска комора на Македонија, Привредна комора на Србија и Министерство за трговија, туризам и телекомуникации на Република Србија. На поздравниот говор и презентацијата директорот на АППТ г-дин Љупчо Јаневски ги истакна успешноста и позитивните реакции од сите инволвирани туристички професионалци на саемскиот настап во Белград, туристичките можности кои ги нуди Македонија на српските туристи, како и очекувањата и предвидувањата за туристичка размена меѓу овие две земји.

Македонскиот штанд беше посетен од претставници на Амбасадата на Република Македонија во Белград и студентите од Факултетот за туризам и бизнис логистика  при Универзитет “Гоце Делчев” од Штип.

Назад 

Креиран од Mevludin.S на 23.02.2018