logo

Агенција за промоција и поддршка на туризмот

 


ДО ПОДОБРА ПРОМОЦИЈА ПРЕКУ ЈАКНЕЊЕ НА КАПАЦИТЕТИТЕ НА АГЕНЦИЈАТА ЗА ТУРИЗАМ

ДО ПОДОБРА ПРОМОЦИЈА ПРЕКУ ЈАКНЕЊЕ НА КАПАЦИТЕТИТЕ НА АГЕНЦИЈАТА ЗА ТУРИЗАМ

 

Според долгогодишниот прв човек на словенечкиот и европски туризам, Македонија треба да продолжи и уште повеќе да ги интензивира инвестициите и брендирањето на Македонија како една уникатна нова европска држава, со неверојатни ресурси и богата традиција. Според него, доколку тоа се направи во соработката со приватниот сектор кој може да даде најголем придонес, Македонија сигурно ќе стане една уникатна земја каде што сите со задоволство ќе доаѓаат.

 

Г. Хрибар престојуваше во Македонија на покана на Програмата на УСАИД за подобрување на работењето на организациите како дел од тимот кој работи на развивање на стратешки план на Агенцијата за промоција и поддршка на туризмот.


Програмата на УСАИД за подобрување на работењето на организациите, имплементирана од Детра Центар, втора година по ред го поддржува развојот на капацитетите на седум организации кои се клучни за економските, образовните и демократските процеси во државата.

 

 

 

Кој е вашиот најголем успех во промоција на туризмот во Словенија и другите земји во развој за кои што имате работено?


Од кога станав генерален директор на словенечката Агенција за туризам во 2005 година до 2015 година буквално го дуплиравме значењето и придонесот на туризмот во Словенија. Од милијарда евра девизен прилив од туризмот, дојдовме до девизен прилив на 2,4 милијарди евра и така станавме една од европските држави со најголема стапка на раст на туризмот. Со нашата кампања „I feel Slovenia“ освоивме многу големи награди на сите поголеми саеми и овој наш брендинг се покажа како еден успешен пат и резултатите се она на што ние се гордееме. Заедно со тоа многу важен фактор е што направивме долгорочно стратешко партнерство со приватниот сектор. Тоа ми беше една од најголемите мисии во кои верував, бидејќи јас доаѓам од приватниот сектор каде што бев директор на маркетинг во еден од најголемите хотелски синџири во Словенија. Според мене, за да се постигне ова, првата метода која треба да се направи е подеднакво вложување инфраструктурата, како и во квалитет на услугите.


Во мојот период Словенија само за промоција инвестираше од 7-9 милиони евра, а во последно време инвестициите за промоција се зголемија на 12 милиони евра. Дополнително за поттикнување на инвестиции вложувавме околу 25 милиони годишно со помош на европските проекти. Значи тајната е 20% да оди на администрацијата, а остатокот од 80% на промоција. Во никој случај тоа не треба да е обратно.

 

 

 

 

 

 

Како ја оценувате состојбата на туризмот во која се наоѓа Македонија?


Во Македонија дефинитивно се забележува голем потенцијал и голема амбиција на Владата за поддршка на туризмот. Има многу голема амбиција и на малиот приватен сектор. Тоа е нешто што и бројките го потврдуваат. Македонија се повеќе и повеќе почнува да станува атрактивна туристичка дестинација. Тоа што сега недостасува е подеднаков регионален развој во сите осум региони во Македонија и нормално недостасува да се вложува уште многу капитал во туризмoт.

 

Според моето гледање, во новата финансиска перспектива Македонија ќе има големи пари на располагање, дури мислам дека ако во овој момент Македонија би влегла во Европската Унијата би имала на располагање сигурно два пати поголем буџет од Словенија, а тоа би значело неколку стотина милиони евра само за развој на туризмот. И тоа според мене е идеална основа за носење на странски инвестиции.

 

Македонските туристички XXработници често се жалат на немањето на соодветна инфраструктура, немањето на адекватна поддршка од финансиските институции… Како светскиот туризам го надминува овој проблем и кои се начините преку кои државата може најдобро да му помогне на туризмот?


Јас не би се сложил дека македонската држава работи помалку од другите, напротив јас мислам дека системот на субвенции кој постои во Македонија е една директна мерка за поттикнување на туризмот. Но, според мене може уште повеќе да се направи со изградбата на инфраструктура, со изградбата на дестинациски организации во сите осум региони, подобро искористување на сите ресурси како македонските вина, храна и општо македонската култура. За сето ова ќе треба уште поголема компетенции и во Aгенцијата и во коморите. Значи првата работа е приватниот и јавниот сектор да почнат да работат заедно и нормално во едукацијата да се вложува максимално можно енергија. Ова се работи за кои секогаш има место да се поправат, не само во Македонија и Словенија, туку и во Австрија, па дури и во Швајцарија.

 

Какви и кои искуства од развиените XXекономии се апликативни за Македонија во однос на развојот на туризмот? Кои примери/искуства би ги посочиле како најефективни и најапликативни за Македонија?


Првата работа се инвестиции. Значи, треба да се продолжи со поттикнувањето на инвестициите, веројатно тоа ќе бидат странски инвестиции. Во септември ќе се организира првиот туристички инвестициски форум, кој ќе се одржи во Скопје под покровителство на Светската туристичка организација. Следно е продолжување на брендирањето на Македонија. Сигурно треба да се издржи и на патот на политичкото признавање на Македонија како држава. Иако тоа е политичко прашање и не е моја надлежност, мислам дека тоа е многу важно, државата Македонија мора што побрзо да стане бренд Македонија и да биде една уникатна нова европска држава, една држава со неверојатни ресурси и богата традиција и една уникатна земја каде што сите со задоволство ќе доаѓаат.


Значи, најважно е Македонија стратешки да го постави туризмот како еден од приоритетите и врз тоа да се изгради модерна туристичка организација која со помош на јавно-приватно партнерство ќе биде еден од главните фактори за понатамошен развој на туризмот. Имајќи ги предвид ресурсите цврсто сум убеден дека туризмот во Македонија ќе расте побрзо од просекот во ЕУ. Што се однесува до иднината на македонскиот туризам, јас сум голем оптимист.

 

Во која насока ќе се развива светскиот XXтуризам во наредната деценија ? Што е тоа што ќе се бара и за што ќе им најголем интерес?


Светскиот туризам ќе расте во просек секоја година по 4%. Новите трендови се многу интересни. Во иднина нема повеќе да има толку многу одмори на принципот сонце и плажа, туку повеќе ќе има активни одмори, многу повеќе ќе се бараат уникатни производи, ќе се бараат квалитетни ресурси како што се квалитетна храна, вода и воздух. Ќе се намали делот на интерконтинентални авио гости, бидејќи луѓето повеќе ќе патуваат, по неколку пати годишно по неколку дена, наместо на еден голем одмор во годината од 15 дена. Сите овие трендови јас мислам дека би требало да и бидат во прилог на Македонија. Значи повеќе ќе има туризам внатре во регионот во наредните 20 – 30 години. Кина е единствен исклучок и таа дефинитив-но ќе стане прва светска велесила и сите треба да се подготвиме за тоа. Големи ќе бидат бројките веројатно и заработката, и мислам дека ќе има голем потенцијал и за Македонија, бидејќи треба да се знае дека за Кинезите поранешна Југославија е нешто што тие сакаат да го посетат. Повеќе од 100 милиони Кинези секоја година излегуваат од Кина, а тој број се очекува да се дуплира во следниот период. Плус се повеќе ќе излегува една друга клиентела од Кина, која нема да е концентрирана само на Париз, Лондон и Виена, туку ќе гледа многу пошироко. И според мене, тоа ќе биде можност и за за Словенија и за Македонија.

Назад 

Креиран од Ognen на 30.03.2016