logo

Агенција за промоција и поддршка на туризмот

 

ЗА НАС
 

Агенијата за промоција и поддршка на туризмот во Република Македонија е институција основана од Владата на Република Македонија. Основна функција на Агенцијата за промоција и поддршка на туризмот е промоција на туристичките ресурси на Република Македонина на странски пазари, како и управување и поддршка на проекти чија цел е развој на туризмот во целина. АППТРМ е основана во 2008 година според “Закон за основање на Агенција за промоција и поддршка на туризмот во Република Македонија” („Службен весник на Република Македонија“ бр. 103/2008 ).

 

Органи на Агенцијата за промоција и поддршка на туризмот се: Управен одбор (кој се состои од 7 членови) и Совет (сочинет од 15 членови). Владата на Република Македонија дава согласност за Статутот на Агенцијата за промоција и поддршка на туризмот, годишната програма за работа и годишниот финансиски план, додека Министерството за економија врши надзор над законитоста на работењето на Агенцијата за промоција и поддршка на туризмот. Агенцијата за промоција и поддршка на туризмот има два сектори: сектор промоција и сектор поддршка.

 

Надлежности и стратешки приоритети на Агенцијата за промоција и подршка на туризмот се:

  • - Активно унапредување и промоција на туризмот и професионално  презентирање на  сите сегменти и региони од туристичката  понуда, како и изготвување на анализа за потенцијалите на домашниот и странскиот туристички пазар;
  • - Подготвување и реализиција на програмата и обезбедување информативен материјал за промоција и поддршка на туристичките вредности;
  • - Формирање и развивање единстевн туристичко информативен систем и негово поврзување со други информативни системи;
  • - Активно промовирање на вкупниот туристички потенцијал на Република Македонија во земјата и во странство и соработка со светски познати туроператори за привлекување на што поголем број туристи;
  • - Позиционирање на нови туристички пазари;
  • - Поттикнување и координирање на сите туристички организации, комори, асоцијации, здруженија и други институции од областа на туризмот и угостителството, со цел унапредување и промоција на туризмот;
  • - Иницирање и насочување меѓуопштинска, регионална и меѓународна соработка за  промоција на туризмот;
  • - Учество во привлекување инвестициии во туристичкиот сектор во Република Македонија;
  • - Унапредување и поддршка и развој на вкупниот туристички потенцијал на земјата.
  • - Агенцијата за промоција и подршка на туризмот ги извршува сите други активности согласно со законот и Статутот.

 

Туризмот е моќен стопански сегмент за развој на економијата, главен двигател и основен столб на социо-економскиот напредок на развиените, но и на земјите во развој. Ефектите од туризмот се повеќекратни и пред сè се видливи преку порастот на девизниот прилив, подобрување на платниот биланс, креирање на нови работни места, но и пораст на инвестициите. Брзиот раст на туризмот на глобално ниво охрабри голем број држави при преземањето на директни чекори кон развој на туризмот и негов посериозен третман. Согласно оваа динамика на раст и развој како и значењето на туристичката индустрија, визијата и мисијата Агенцијата за промоција и поддршка на туризмот е во насока на одговорно и одржливо развивање на туризмот во Република Македонија, со цел поголем придонес во економскиот развој,  намалување на сиромаштијата, зачувување на биодиверзитетот и менаџирање на природните ресурси. За успех во сферата на туризмот е неопходно правилно планирање и менаџирање кое се постигнува со посветена и одговорна работа, но и со отворена и конструктивна меѓусекторска соработка на институциите. Агенцијата за промоција и поддршка на туризмот, како маркетинг и пазарно ориентирана институција, преку промотивни активности и креирање на туристички производи во соработка со стопанството, придонесува кон поголема кокуректност и препознатливост на Република Македонија како туристичка дестинација.

 

Индиректните резултати од досегашното работење на Агенцијата за промоција и поддршка на туризмот се видливи преку постигнување на одредено ниво на препознатливост и конкурентност на македонскиот туристички производ, додека директните резултати покажуваат пораст од 150% во бројот на странски туристи и  просечен пораст на годишно ниво од 15% на девизниот прилив од ставка туризам.

 

Агенцијата за промоција и поддршка на туризмот на Република Македонија водејќи се од својата заложба за континуиран развој, унапредување и афирмација на туризмот, а имајќи ги предвид предностите и економската корист од развојот на оваа стопанска гранка, инвестира и работи на реализација на програмските активности, со цел подобра и поефикасна туристичка понуда. Работењето на Агенцијата се заснова врз принципите на: стручност, професионалност, транспарентност, одржливост и одговорност и во тој контекс се цели кон одговорно и професионално работење, особено на можностите за зголемување на бројот на туристи. Агенцијата за промоција и поддршка на туризмот е свесна за значењето на маркетингот и брендирањето на државата, како и соодветното позиционирање на Македонија во морето од држави и туристички дестинации преку запознавање на светската јавност природата, историјата, културата и гастрономијата.