Насловна Соопштенија Почнува кампањата „Дома си е дома“ за поддршка на домашниот туризам

Почнува кампањата „Дома си е дома“ за поддршка на домашниот туризам

Сподели

Агенцијата за промоција и поддршка на туризмот – АППТ во соработка со Програма за зголемување на пазарната вработливост – ИМЕ, поддржана од Швајцарската агенција за развој и соработка-SDC, денес ги промовираа 10-те промотивни видеа за поддршка на домашниот туризам.

Според Директорот на АППТ, г-дин Љупчо Јаневски очекувањата на АППТ од овој проект се домашните туристи да овозможат зајакнување на туризмот и домашната економија, како и задржување на секое работно место во оваа индустрија која во овој момент е многу ранлива поради кризата. “На овој начин сакаме фактичката туристичка понуда да ја доближиме до домашните потенцијални туристи, да им покажеме што се има во оваа наша убава земја и каде можат безбедно да го поминат својот одмор со семејството или пријателите. Свесни сме дека оваа година поради пандемијата од Ковид 19 туризмот во голем дел потпрен на домашните туристи, а ова е само мал чекор со кој поттикнуваме раздвижување на оваа индустрија при што очекуваме бројот на ноќевања да достигне до два милиона”, изјави Јаневски, Директор на АППТ.

Во своето обраќање за време на промотивниот настан пред медиумите, амбасадорката на Швајцарија во Република Северна Македонија, Н.Е. Сибил Зутер Техада, истакна: „Оваа кампања ја гледаме како симбол на соработка и нејзиниот успех директно зависи од широката поддршка од сите. Важно е чинителите вклучени во туризмот да се вклучат во кампањата и да ги користат видеата и останати елементи кога ја промовираат својата понуда. Медиумите, исто така, имаат важна улога во споделување позитивни приказни за потенцијалот на туризмот во државата. Среќни сме и за соработката со останатите донатори кои ја препознаа важноста на кампањата „Дома си е дома“. Во таа насока, би сакала да се заблагодарам на амбасадорката на Велика Британија. Н.Е. Рејчел Галовеј за нивниот придонес во кампањата.“

  

Во прилог на ова известување, на медиумите им се ставаат на располагање производите од кампањата, и тоа: 10 промотивни видеа, фотографии од снимањето на видеата, официјалното лого на кампањата „Дома си е дома“ и останати визуелни и звучни елементи за промоција на кампањата на веб и социјални медиуми. Овие производи се достапни за користење на сите медиуми со што би придонеле за дополнителна промоција на кампањата.

10-те промотивни видеа потребно е да се споделуваат интегрално во својата оригинална, авторска форма. Додавање на други визуелни елементи и обележја во видеата не е дозволено.