Насловна Соопштенија Агенцијата за туризам и туристичкиот сектор најавуваат уште една успешна сезона

Агенцијата за туризам и туристичкиот сектор најавуваат уште една успешна сезона

Сподели

На ударниот промотивен настан на берлинскиот интернационален туристички саем ITB Berlın (6-10 март 2019 година) во Берлин, Германија, Република Северна Македонија се претставува со своите природни убавини кои се во фокусот на интересот на странските туристи.

Оваа година на саемот за туризам во Берлин има рекорден број ко-егзибитори од приватниот сектор, а забележан е и зголемен број на тур-оператори кои имаат интерес да организираат туристички посети на нашата земја. Според досегашните проценки на АППТ, можно е зголемување на бројот на странски туристи во текот на 2019 година за 10 – 15%, додека дизајнот на штандот го следи глобалниот тренд за саемско претставување, од отворен тип и простран, со цел полесно комуницирање со посетителите. Како што е познато, Република Северна Македонија и годинава е дел од оваа светска туристичка берза и се претставува заедно со уште 180 земји од светот и над 10.000 егзибитори.

Во рамките на 53-тиот меѓународен туристички саем во Берлин, претставници на Агенцијата за промоција и поддршка на туризмот остварија и координативен состанок со претставници на националните организации од Србија и Црна Гора со цел заденичко претставување на азискиот пазар и привлекување туристи од Далечниот Исток во нашиот регион. Дополнително, делегацијата оствари контакти со тур-оператори од Швајцарија, Полска, Германија, Русија и од Израел, а беше реализирана и средба со претставници на Визер, кои најавија посета на новинари од Германија, како и нови авио-линии во текот на летниот период на релација Малме-Охрид и Мемингем-Охрид.

Покрај големиот интерес за Македонија од страна на тур-оператори од целиот свет, заинтересираност за соработка и промоција на нејзините туристички можности изразија и повеќе светски медиуми, меѓу кои и Вандерласт, Еуроњуз, Еуроспорт, Волстрит Џорнал и други.

На отворањето на Меѓународната туристичка берза (ITB), на која земја-партнер е Малезија, зборуваа директорот на Саемот, градоначалникот на Берлин, министрите за туризам, економија и енергетика на Германија, генералниот Директор на Туристичката агенција на Обединетите Нации и министерот за туризам на Малезија. Тие го потенцираа значењето на туризмот како важна стопанска гранка за развојот на економијата и посебно ја нагласија неговата поврзаност со афирмацијата на културата и идентитетот на секоја земја во светот.