Насловна Uncategorized @mk Прес конференција 26.12.2018 год.

Прес конференција 26.12.2018 год.

Сподели

Агенцијата за промоција и поддршка на туризмот на Република Македонија, предводена од директорот Љупчо Јаневски денес одржа прес конференција за да се информира јавноста за реализација на пограмските активности на Агенцијата за туризам во 2018 година. На истата се презентираа резултатите од досегашната работа, идните проекти и активности кои ќе се реализираат во наредната 2019г, проследено со податоци за растот на бројот на туристи и БДП-то по основ туризам, како и очекувања за наредниот период.

Агенцијата за промоција и поддршка на туризмот (АППТ) водејќи се од својата заложба за континуиран развој, унапредување и афирмација на туризмот, а имајќи ги предвид предностите и економската корист од развојот на оваа стопанска гранка, инвестира и работи на рализација на програмски активности, со цел да се овозможи подобра и поефикасна туристичка понуда. АППТ во текот на целата година работи на можностите за зголемување на бројот на туристи, како и на позиционирањето на Македонија како успешен бренд и запознавање на светската јавност со нејзините природни и историски туристички карактеристики.

Позитивениот тренд на растот во бројот на туристи продолжува и во 2018та година. Во периодот јануари – октомври 2018 година, во однос на истиот период од претходната година, бројот на туристите е зголемен за 13.1 %, и тоа: кај домашните туристи има зголемување за 14.1 %, а кај странските има зголемување за 12.5 %.

Во периодот јануари – октомври 2018 година, во однос на истиот период од претходната година, бројот на ноќевањата е зголемен за 14.9 %, и тоа: кај домашните туристи има зголемување за 14.2 %, а кај странските има зголемување за 15.8 %.

Првите 10 месеци за 2018 година не посетиле 1,013 431 туристи, со остварени 2.936 514 ноќевања.  Во однос на девизниот прилив, првите три квартала за 2018 година споредбено со 2017 има зголемување за 17%, со остварени 298,93 милиони американски долари.

Овие позитивни статистики се резултат на континуираната работа на АППТ  и туристичкиот сектор, а се однесуваат на зголемената промоција и поддршката која ја дава институцијата за реализација на проекти значајни за развој на нови туристички содржини.

Оваа година АППТ реализираше 12 интернационални  саемски манифестации (Утрехт, Брисел, Берлин, Тел Авив, Загреб, Белград, Софија, Истанбул, Хелсинки, Римини, Варшава, а во Измир за прв пат Македонија беше земја партнер на саемот).

За наредната година се очекува учество на рекорден број ко-егзибитори на интернационалите саеми за туризам. Најголем е интересот за регионалните саеми, посебно за саемите во Србија и Бугарија. Во оваа прилика би сакале и официјално да најавиме дека Македонија ќе биде земја -партнер на саемот во Загреб, Хрватска за 2019 година.

Од истите тие саеми, АППТ има остварено 15 инфо тури со тур оператори од 10 држави од светот. На овие  патувања Македонија ја посетија новинари и медиумски куќи, кои од посетата објавија повеќе од 40 написи во странски медиуми.

Агенцијата за туризам е активна и на социјалните медиуми. Социјалните медиуми (Фејсбук, Твитер и  Инстаграм, како и You Tube) се моќна алатка за презентација на македонските туристички капацитети и промоција на институцијата и нејзината работа. За тоа говорат и бројките на Фејсбук фан страните на Агенцијата за туризам и Macedonia-timeless. Активно се работи на содржините на веб страните www.macedonia-timeless.com (наменета за странскиот пазар) и www.tourismmacedonia.gov.mk (која е во функција на туристичкиот сектор).

Согласно програмата на АППТ за 2018 година се реализираше медиумска кампања во 12 земји: Словенија, Србија, Бугарија, Албанија, Косово, Хрватска, Полска, Романија, Шведска, Естонија, Израел и Турција. Посакуваните резултати од медиумските активности се задржување и зголемување на бројот на туристи од овие туристички пазар. По спроведените анализи и истражувања на пазарот, медиумски активности и промовирање на туристичките потенцијали на Македонија се реализираат преку следниве промотивни каналии: принтани медиуми, електронски медиуми, билборд кампања, телевизиски прилози, репортажи, видеа и гостувања. АППТ во период од ноември до јануари 2019 година започна со реализација на втор дел медиумска кампања со цел промоција на зимските активности, настани и дополнителни туристички содржини кои може да ги понуди Македонија во зимскиот период.

АППТ дополнително лансираше нова едиција на водичи кои ќе придонесат за поквалитетна промоција на туристичките потенцијали на Македонија. Гастрономски туризам како една од селективните форми на туризмот заслужува внимание бидејќи тоа е една од јаките страни на нашата земја. За таа намена се изработи водич “Вкусовите на Македонија“, во вид на патеписни приказни за гастрономијата, традицијата, фолклорот и културното наследство во нашата земја. Водичот содржи локални и регионални традиционални рецепти за одредени јадења од сите 8 региони во Македонија.

Генерална брошура за туризмот во Република Македонија, а тоа е “Македонија неоткриено туристичко богатство” денес официјално ја промовираме. Истата содржи информации за туристичките продукти во нашата земја, кои ја карактеризираат како уникатна и атрактивна туристичка дестинација.

Дополнителни промотивни материјали наменети за промоција на Македонија се: промоција на проектот Македонски туристички пасош. Истиот е изработен во форма на брошура која содржи корисни информации за туристичките потенцијали на Македонија. А, која ќе служи за анимација на домашните и странските туристи. Се изработи и редизајн на брошурите за петте градови, Скопје, Битола, Струга, Крушево и Охрид.

Според програмските активности, АППТ оваа година како и наредната 2019 година, ќе продолжи да соработува со туристичките ентитети и активно да работи на зајакнување и валоризација на нови туристички производи. Зголемување на понудата во авантуристичкиот туризам, која е многу подоходовна за лoкалната економија, е можност странските и домашните туристи на интересен начин да излезат од секојдневието.

АППТ и оваа година продолжува со реализација на проектот за „Развој на спортското качување и негово ставање во функција на туризмот“. За развој на овој рекреативен спортски туризам  се уредија  нови и се изврши санација на постоечки тренинг локации за качување на карпа, со поставување на околу 120 насоки. Туристите и сите оние кои практикуваат екстремни спортови, желбите за адреналин и авантуризам ќе можат да ги доживеат на качувачките локалитети кај Матка, Маврово и Кадина во близина на Скопје.

Возбудливите искуства на љубителите на ова парче небо се најдобра промоција на Македонија, како дестинација за развој на параглајдинг. За таа цел, АППТ го подржа уредувањето на полетиште за параглајдинг во Крушево – поставување на вештачка трева на полетиштето заради зголемување на безбедноста на параглајдеристите и исполнување на стандарди за одржување на меѓународни натпревари со цел промоција на Република Македонија како дестинација за параглајдинг.

АППТ е насочена и на реализација на проект за  “Развој на алпинизам“, преку уредување на локации за алпинистичко качување (Матка, Демир Капија, Лешница и Остра Карпа), со цел зголемување на безбедноста и атрактивноста на локациите и привлекување на поголем број на туристи од еден од најбрзо растечките пазари. Со цел да се збогати туристичката понуда на Македонија од областа на културниот туризам и активностите во природа, во завршна фаза е проектот “Мапирање на патот Виа Игнација”. Мапиран е стариот римски пат со 13 инфо табли и 5 миокази.

АППТ и оваа година како и наредната 2019 ќе продолжи со финансиска поддршка на манифестации. Целта е манифестациите да привлечат што повеќе гости со професионална организација и истите  да прераснат во традиција.

За наредната година планирана е промоција на 10 најкачувани врвови во Македонија. Обележување на неколку правци на качување на Бислимска клисура –Куманово и поддршка за развој на локалитет Кукуље село Нов Истевник, Делчево. Во соработка со Светска Банка поставени се насоки за изработка на 20 годишна стратегија на Македонија со мастер планови.

Интегриран пристап во стратешките проекти, координиран настап во изнаоѓање на решенија, синхронизираност во изнесувањето на податоци и споделување на информации кои ги тангираат туристичките субјекти се насоки за кои се заложува АППТ. Сите засегнати страни треба да водат позитивна борба и да се изнесат конкретни барања, да се предложат мерки и активности врз реална основа, потребни на целиот туристички сектор.