Агенцијата за промоција и поддршка на туризмот на Република Македонија заедно со ЈСП Турс ја организира досега најголемата инфо тура со новинарски екипи од регионот. Повеќе од десет медиумски куќи од Хрватска, Србија, Црна Гора и Босна и Херцеговина специјализирани за туризмот во следните четири дена ќе ги посетат највпечатливите туристички атракции во Република Македонија.
Градот Скопје со Старата Чаршија, Старата железничка станица, Спомен куќата на Мајка Тереза, црквите Св. Спас , Св. Димитрија, плоштадот Македонија, гастрономијата и Калето се само мал дел од локациите за првиот ден.
Вториот ден е резервиран за Пантелејмон ,Кањонот Матка со пештерата врело, Националниот парк Маврово, Јован Бигорски, Дебарското езеро , градот Дебар и Струга, каде новинарите ќе имаат можност да ги видат природните убавини и запознаат со можностите за рурален , екотуризам и алтернативните форми на туризмот со кој овој дел на Македонија изобилува.
Средата е резервирана за најпосетената туристичка дестинација кај нас, градот Охрид и охридската ревиера со посета на неговите природни и културни знаменитости, гастрономијата и мистиката која ја поседува како град под заштита на УНЕСКО.
Последниот ден ќе биде посетена на градот на конзулите Битола и винскиот регион на Македонија со посета на винскиот пат и дегустирање на повеќе врвни сорти на македонски вина.
Овој тип на организирани инфо патувања е резултат на учеството на Агенцијата на промоција и поддршка на туризмот во Република Македонија и туристичкиот сектор на регионалните саеми за туризам и овозможува преставување на македонските туристички потенцијали во повеќе од петнаесетина регионални медиуми.
